ostage

Ostage, m. penac. Est la personne qui est baillée à l'ennemy de guerre, pour seureté et entretenement de la foy, parole et promesse de celuy qui le baille, comme gage militaire, comme si l'on disoit ostgage, et fut composé de ces deux mots, ost et gage, Obses, que l'Espagnol dit Rehen, et l'Italien Statico, pignus militare, aussi est-ce un mot militaire. Aucuns l'escrivent par h, Hostage, ce qui seroit tolerable, par ce qu'il vient de ce mot Latin Hostis, et que l'Espagnol dit aussi Hueste, pour ce que le François dit ost, c'est à dire, armée. Mais le François suit son orthographe, escrivant ostage qu'il derive de ost, Obses, lequel est baillé à tel droict, que si celuy pour qui il tient ostage, default de sa foy, parole et promesse il est promis à celuy qui l'a prins à ostage, d'user de toute puissance sur sa vie et sur sa mort. Toutesfois il semble que ce droict de faculté rigoureuse sur l'ostage n'ayt esté tenu pour regulier en France: car du regne de Charles quatriesme, Charles Comte de Valois son oncle, et Lieutenant general en l'armée qu'il avoit envoyé contre les Anglois, Aymé frere d'Edoard II. Roy d'Angleterre, et son Lieutenant general en la contre armée, ayant traicté appointement audit Charles de Valois, et baillé quatre Chevaliers Anglois en ostage, fut nomméement convenu entre eux, que si ledit Aymé, au cas que son Roy ne voulust ratifier ledit appointement, ne retournoit en France, on coupperoit les testes à sesdits ostages. Ainsi l'escrit Nicole Gilles en la vie dudit Charles quatriesme: car cette convention n'eust esté specialement faite, si ce eust esté regulier en fait d'ostages. Le mot Latin semble monstrer que l'usage des ostages a esté mis en avant par le moyen des sieges mis devant les villes et forteresses, pour estre gages de l'entretenement des capitulations reciproques des assiegez et assiegeans. Mais Feste celebre grammairien entre les Latins l'interprete plus au general, disant que ce mot Latin Obses, est composé de Ob et Fides, par transmutation de la lettre f, en s, pour estre l'ostage baillé pour l'observation de la foy en occurrence militaire, comme dit est. Mais le mot François ostage, ne peut subir par sa contexture la consideration d'iceluy Feste, combien que l'effect és deux se rencontre, qui est le gage de la foy donnée en fait de guerre. Qui vouldroict dire que ostage vient de ost, qui vient du Latin Hostis, et gage, comme estant gage donné en cas d'hostilité, paradventure diroit il chose qui viendroit à propos. Et ainsi pour marque de son extraction le conviendroit escrire par h, hostage, Hostimentum: Car l'hostage est l'equipolant de la foy ou rançon de celuy qui le baille. {{o=baillé}}

Tenir ostage pour aucun Prince, c'est estre en gage pour la seurté de la foy, parole et promesse d'aucun Prince donnée à son ennemy de guerre, Pro pignore militari esse. Nicole Gilles en la vie du Roy Loys III. Karloman mourut és mains des Normans, tenant ostage pour sondit pere. Cecy est par la mesme raison que on dit, Tenir prison pour aucune somme deuë.

Celuy qui nous est baillé en ostage, est nostre hoste (est apud nos) jusques à l'accomplissement des promesses.

Bailler ostage, Obsides dare.

Bailler ostage jusques à ce qu'on ait baillé tout l'argent promis, Obsidibus cauere de pecunia.

Prendre ostages, Obsides accipere.

Thresor de la langue françoyse. Jean Nicot.